Һәлак булган 28 яшьлек Динараның ире Тимур хатынының соңгы сәгатьләре һәм аларның бергә үткәргән еллары турында сөйләде.

Түбән Камада БПЛА һөҗүме нәтиҗәсендә ике кеше һәлак булды, 14 кеше зыян күрде. Шәһәр мэры Радмир Беляев хәбәр иткәнчә, пилотсыз очкычлар торак йортка зыян китергән, шулай ук сәнәгать предприятиеләренең берсендә янгын чыккан.

Һәлак булган ике хатын-кыз һөҗүм вакытында такси машинасында булган. Фаҗига Җиңүнең 30 еллыгы һәм Студентлар урамнары киселешендә килеп чыккан.

«Бер секунд алдан — бер секунд соңрак, һәм фаҗигане булдырмый калып булыр иде», — дип язды шәһәр мэры.

«Исән дип өметләндем»

RT басмасы мәгълүматларына караганда, һәлак булганнарның берсе — 28 яшьлек Динара. Ул Алабугада яшәгән һәм Түбән Камада педагогика көллиятендә бергә укыган дустына кунакка килгән булган. Фаҗигагә кадәр кызлар төнге клубта булган, таң алдыннан таксига утырып өйләренә кайтырга чыккан. Динараның ире Тимур ул көнне хатыны белән бергә Түбән Камага барырга теләгән, әмма эштә булу сәбәпле кала алмаган.

«Мин дә аның белән Түбән Камага барырга теләгән идём, ләкин булдыра алмадым. Икенче көнне эшкә кирәк иде. Ул Түбән Камага еш йөри иде. Аның анда якын дусты бар, без гаиләләр белән дус идек», — дип сөйләгән Тимур.

Аның сүзләренчә, кызлар таң алдыннан клубтан чыгып таксига утырган. Рима машина йөртүче янында алгы утыргычта, ә аның сеңлесе Раилә һәм Динара артта утырган.

«Бәрелү дулкыны булды, кыйпылчыклар машинага керде. Раилә белән Динара һәлак булдылар», — дигән ул.

Тимур фаҗига турында 13 сентябрь иртәсендә белгән. Аңа Риманың ире таксига пилотсыз очкыч төшүе турында хәбәр иткән. Башта Тимур Динараның исән калуына өметләнгән.

«Мин хәбәрне ничектер сүз арасында укыдым, „реанимация“ дигән сүзне күрдем. Ул исән дип өметләндем. Ләкин соңрак миңа моргка барырга кирәклеген әйттеләр. Шул мизгелдә барысы да юкка чыкты», — дип искә алган ул. Тимур эшеннән чыгып, Түбән Камага юл тоткан. Юл буе хәбәрнең ялгыш булуын теләгән.

«Динара — якты, яхшы күңелле кеше иде»

Тимур белән Динара 2013 елда социаль челтәрләрдә танышкан. Ир-ат сүзләренчә, ул кызны моңа кадәр берничә тапкыр күргән булган, әмма танышырга кыюлыгы җитмәгән. «Шуңа күрә аңа социаль челтәрдә язарга булдым», — дип сөйләгән ул.

Аларның аралашуы еллар дәвам иткән. Соңрак дуслык мөнәсәбәтләргә әверелгән. Тимур сүзләренчә, аларның бергә яшәгән еллары аның тормышындагы иң бәхетле чор булган.

Өч ел элек пар мөнәсәбәтләрен рәсми рәвештә теркәгән. Ир белән хатын Алабугада яшәгән. Динара педагогика көллиятен тәмамлаганнан соң балалар бакчасында тәрбияче булып эшләгән. Соңрак аны металл конструкцияләр җитештерүче заводка җитәкче ярдәмчесе итеп чакырганнар. Ул анда хезмәт баскычыннан күтәрелгән һәм башкарма вазифасына кадәр җиткән. Тимур хатынын максатчан, якты күңелле һәм кешеләргә яхшылык теләүче кеше буларак искә ала.

«Динара — якты, яхшы күңелле кеше иде. Беркемгә дә ачуы чыкмады. Ул һәрвакыт яхшылыкка өндәде. Ярата белә иде. Идеаль хатын булды, шундый ук идеаль әни була алыр иде», — дигән Тимур.

Аларның киләчәккә планнары да күп булган. Ноябрьдә зур компания белән Таиландка барырга җыенганнар. Кунакханә сайланган, билетларны бу атнада сатып алырга планлаштырганнар. «Кызганычка каршы, хәзер бу планнарның берсе дә тормышка ашмаячак», — дигән Тимур.

Динараны 14 сентябрьдә туган шәһәре Алабугада җирләгәннәр. Аның әнисе һәм абыйсы калган. Әтисе 2017 елда вафат булган.

«Туганнары аның сәламәтләнүен теләп дога кыла»

Һөҗүм вакытында һәлак булган икенче хатын-кыз — 25 яшьлек Раилә. Аңа фаҗигадән нәкъ бер атна элек туган көне булган.

Раилә Самара өлкәсеннән. Ун ел элек ул апасы Рима белән Түбән Камага килгән. Алар икесе дә җирле педагогика көллиятендә белем алган һәм соңрак Татарстанда калырга карар кылган. Раилә балалар бакчасында тәрбияче булып эшләгән. Танышлары сүзләренчә, Раиләне туган ягы — Самара өлкәсенең Шенталы районында җирләгәннәр.

Аның апасы Рима хәзерге вакытта хастаханәдә. Табиблар аның хәлен авыр, әмма тотрыклы дип бәяли.

«Туганнары аның сәламәтләнүен теләп дога кыла. Ул күптән түгел генә кияүгә чыкты һәм бала тапты. Ире бик борчыла», — дигән Риманың танышы.

Җинаять эше кузгатылган

Россия Тикшерү комитетының Баш тикшерү идарәсе Түбән Камага булган һөҗүм факты буенча җинаять эше кузгаткан. Ведомство хәбәрендә җинаять эше РФ Җинаять кодексының 205нче маддәсе — террорчылык акты билгеләре буенча тикшерелүе әйтелә.

Тикшерүчеләр һәм криминалистлар вакыйга урыннарында эшли. Тикшерү комитеты хәбәр иткәнчә, табылган БПЛА фрагментлары һәм башка матди дәлилләр буенча экспертизалар билгеләнәчәк.